Astudiaethau Plentyndod ac Ieuenctid a Chymraeg - BA (Hons)

Bangor University

Mae’r radd Astudiaethau Plentyndod ac Ieuenctid a Chymraeg yn mynd i’r afael â’r galw cynyddol am raddedigion Cymraeg eu hiaith sydd â’r wybodaeth am ddiwylliant Cymru a’r arbenigedd proffesiynol sydd eu hangen i weithio’n effeithiol ac yn empathetig â phobl ifanc a’u teuluoedd mewn gwahanol gyd-destunau. Mae’n radd ar y cyd sy’n cyfuno dysgu am iaith, llenyddiaeth a diwylliant Cymru ag archwilio i’r sbectrwm llawn o brofiadau plentyndod ac ieuenctid, o’r cenhedlu i’r trawsnewid i fod yn oedolyn. Mae hyn yn cynnwys llencyndod, hawliau plant, datblygiad, dysgu, chwarae, hunaniaeth, diogelu, iechyd meddwl ac amrywiaeth. Byddwch yn archwilio ac yn trafod hanes, llenyddiaeth, a diwylliant Cymru gan wella eich hyfedredd ieithyddol ac ymwybyddiaeth ddiwylliannol. Ym Mhrifysgol Bangor, mae astudiaethau academaidd o iaith a llenyddiaeth Gymraeg yn eang ac amrywiol. Gallwch astudio a mwynhau amrywiaeth eang o lenyddiaeth Gymraeg, archwilio gwleidyddiaeth Cymru a gwahanol gyfnodau o hanes er enghraifft. Wrth astudio Astudiaethau Plentyndod ac Ieuenctid, byddwch yn dod i gysylltiad â’r myrdd o faterion cyfoes sy’n effeithio ar blentyndod ac ieuenctid, a chymhlethdodau bywyd modern yn erbyn cefndir newidiadau diwylliannol, cymdeithasol, economaidd, addysgol a gwleidyddol byd-eang. Mae’r radd cyfrwng Cymraeg hon yn ddelfrydol ar gyfer siaradwyr Cymraeg a’r rhai sy’n dymuno dilyn gyrfa yng Nghymru. Byddwch yn gallu dysgu sgiliau damcaniaethol ac ymarferol wrth gefnogi plant a phobl ifanc, gan gynnwys cefnogi plant ag anghenion dysgu ychwanegol ac anawsterau cyfathrebu trwy fanteisio ar gyfleoedd i ddysgu technegau cefnogi cyfathrebu. Mae opsiynau 'Blwyddyn Profiad Rhyngwladol' a 'Blwyddyn ar Leoliad' ar gael ar gyfer y cwrs hwn. Bydd gennych y cyfle i ystyried yr opsiynau hyn yn llawn ar ôl cychwyn eich cwrs ym Mangor a gallwch wneud cais i drosglwyddo i un o’r opsiynau yma ar yr adeg priodol. Mae mwy o wybodaeth am yr opsiynau hyn ar ein gwefan, ac mae croeso i chi gysylltu â ni os oes gennych unrhyw ymholiad.